Sunday, October 6, 2019

සොනාල ගුණවර්ධන සහ බුදු දහම රාජපක්ෂලාට කඩේ යැවීම.

සංවේගයෙන් ලියමි,

"සොනාල ගුණවර්ධන" විසින් බුදු දහම දේශපාලනය වෙනුවෙන් වැරදි අර්ථ කථන දෙමින් භාවිතා කර ඊනියා සිංහල බෞද්ධ ඡන්ද ගැරීමට දරන නින්දිත උත්සාහය නින්දිතය. බෞද්ධයන්ව මේ ආකායෙන් දේශපාලනික හේතු මුල් කර අව භාවිතා කිරීම අතිශය සංවේග දනවන කරුණකි. පහත දක්වා ඇත්තේ ඔහුගේ මුහුණු පොතින් උපුටාගත් කොටසකි.

permanent link: https://www.facebook.com/photo.php?fbid=10156438716485846
මෙම ලිපියේ අඩංගු කරුණු එකකින්වත් සූත්‍ර දේශනාව සමග ගලපා ගත නොහැක. එයා ඉතා නින්දිත ලෙස වෙනස් කර ඇත. සූත්‍ර දේශනාව කොටස් දෙකින් යුක්ත වේ.
සොනාල මුලින් සඳහන් කරණ කරුණ සත්‍යකි එම සූත්‍රයේ වලාකුළු වර්ග හතරකට බෙදා දක්වා ඇත. ඔබගේ පහසුවට එය, එය සොනාල දක්වා ඇති ආකාරයටම දක්වමි.
  • ගොරවන ගමන් වහින වලාකුළ.
  • ගොරවන්නේ නැතිව වහින වලාකුළ.
  • ගොරවනවා ඒත් වහින්නේ නැති වලාකුළ.
  • ගොරවන්නෙත් නැති වහින්නෙත් නැති වලාකුළ.
සූත්‍රය කොටස් දෙකක් ඇත. ප්‍රථම භාගය සහ දෙවන භාගය ලෙස සූත්‍ර දෙකක් ඇත. එහි මුල් භාගයේ ඇත්තේ මෙවන් කරුණකි. සොනාල විකෘති කර ඇත්තේ එහි අදහසයි. නමුත් එහි මුල් අදහස පහත පරිදි වේ.
  • 'කියනවා' ඒ වගේම 'වැඩත් කරන'
  • කියනවා නමුත් වැඩ නොකරන
  • නොකියවා නමුත් වැඩ කරන
  • කියන්නේත් නැති වැඩ කරන්නේ නැති
ලෙස කොටස් හතරකට වැහි වලාකුළු වලට සමානව වෙන් කර ඇති ආකාරයයි.

ඔබගේ පහසුව පිණිස ගොරවන්නේ ද නැති වහින්නේ ද නැති වලාකුළු ගැන කියනා කොටස සූත්‍ර දේශනාවේ ඇති සැටියෙන්ම උපුටා දක්විමි.
"මහණෙනි, කෙසේනම් පුද්ගල තෙම ගර්ජනා නොකරන්නේ වේද, නොවසින්නේද? මහණෙනි, මේ ලෝකයෙහි ඇතැම් පුද්ගලයෙක් නොකියන්නේත් වේද, නොකරන්නේත් වේද, මහණෙනි, මෙබඳු පුද්ගල තෙම ගර්ජනා නොකරන්නේ වේ. නොවසින්නේ වේ. මහණෙනි, ගර්ජනා නොකරණ, නොවසින ඒ වලාකුල යම් සේද, මහණෙනි, මේ පුද්ගලයා එබඳු යයි කියමි." 
(සම්පූරණ සූත්‍රය කියවීම සඳහා පිවිසෙන්න මෙතැනට https://pitaka.lk/main?n=29201&p=101)
මෙම සූත්‍රයේ දී සොනාල කියන ආකාරයේ අර්ථයක් ඇත්තේ නැත. ඔහු සූත්‍ර දේශනාවේ නැති කරුණු ගණනක් අතින් දමා සංශෝධනය කර ඇත. ඔහු ලොකුම හානි දායක ප්‍රකාශය කරන්නේ අවසානයේ දීය, මම එසේම උපුටා දක්වමි.

"බුදුරජාණන් වහන්සේ මෙම සූත්රයේ දී දේශනාකොට පෙන්වා දුන්නේ මිනිස්සු ගොරවන්නේ නැතිව වහින වලාකුළක් සේ කටයුතු කළ යුතු අතර එසේ වුවහොත් රටක් සංවර්ධනය වනවා සේම තමා ජීවත්වන පවුල් සංස්ථාව ද වේගවත් සංවර්ධනයක් කරා පියනඟනු ඇති බවයි."
(සොනාලගේ සටහනින් උපුටාගත් කොටස) 

මෙහෙම කතාවක් මේ සූත්‍රෙය් නැත. මෙතන සම්පූර්ණයෙන්ම කර ඇත්තේ අතින් දාපු කරුණු වලින් සූත්‍ර දේශනාව විකෘති කිරීමකි.

මෙම සූත්‍ර දේශනාවේ ලෝකෝත්තර හරය ඇත්තේ එහි දෙවන භාගයේ ය.

එම සූත්‍රය දේශනා කොට ඇත්තේ නිර්වාණ ගාමීවයි, එහි වඩා වැදගත් කොට සලකාන කොටස පහතින් උපුටා දක්වමි. අඩුම තරමේ ඔබට මේ ලිපිය නිසා වලාහක සූත්‍රය කියවීමට උනන්දුවක් කිරීමට ලැබුණා යැයි කියා මට සතුටු විය හැක. පහත උපුටා ගැනීම "ගොරවන ගමන් වහින වලාකුළ" ට සමාන පුද්ගලයා ගැනය.
"මහණෙනි, ගර්ජනා කරණලද, වසිනලද, පුද්ගලයා කවරේද?
මහණෙනි, මේ ලෝකයෙහි ඇතැම් පුද්ගලයෙක් සූත්‍ර, ගාථා මිශ්‍ර සූත්‍ර, නිර්ගාථක සූත්‍ර, ගාථා, ප්‍රීතිය පෙන්වූ ධර්ම, නිදානය නැති සූත්‍ර, පූර්‍වාපදාන, පුදුමවියයුතු ධර්ම, බලවත් සතුටින් දෙසූ ධර්ම ඉගෙණගනිත්.
හෙතෙම මේ දුකයයි තත්වූ පරිද්දෙන් දනීද, මේ දුක් ඉපදීමට හේතුවයයි තත්වූ පරිද්දෙන් දනීද, මේ දුක්ඛ නිරෝධය යයි තත්වූ පරිද්දෙන් දනීද, මේ දුක්ඛ නිරෝධ ගාමිණී ප්‍රතිපදාව යයි තත්වූ පරිද්දෙන් දනීද,
මහණෙනි, මෙසේ වනාහි පුද්ගල තෙම ගර්ජනා කරණ ලද්දේද, වසින ලද්දේද වේ. මහණෙනි, ගර්ජනා කරණ ලද, වසින ලද වලාකුල යම් සේද, මහණෙනි, මේ පුද්ගලයා එබඳුයයි කියමි. මහණෙනි, වලාකුලට උපමා ඇති මේ පුද්ගලයන් සතර දෙනෙක් ලොකයෙහි ඇත්තාහ. විද්‍යමාන වෙත්.’’
(සම්පූරණ සූත්‍රය කියවීම සඳහා පිවිසෙන්න මෙතැනට https://pitaka.lk/main?n=29202&p=102)

අවසාන වශයෙන් කියන්නට ඇත්තේ. ඔබ කැමති කෙනෙකුට ඡන්දය දෙන්න, ඔබ කැමති දේශපාලනයක් කරන්න. නමුත් බුදු දහම ඔබගේ දේශපාලන ව්‍යාපාරයට අවභාවිතා නොකරන්න. සියලු උපුටා ගැනීම, විචාරය කිරීමේ අරමුණින් යුතුවය.

Monday, March 19, 2018

කූඹියෝ Season 2 Episode 1 (Fanfiction)

Monday, January 8, 2018

වසර 2061

මිනිස්සු අනාගත ලෝකය මොන වගේ වේවිද කියලා හැමදාම උපකල්පනය කළා. මෙ අනාගතය දෙස බැලීමට මම ගත්ත උත්සාහයක්.

රැකී රක්ෂා

මේ වන විට ගොඩක් දෙනා ශරීරය වෙහසවන රැකියා කරන්නේ නෑ. ඉතිරි වෙලා තියනවානම් ඒ බොහෝම ටිකයි. වාහන අළුත් වැඩියාව, නිවාස ඉදි කිරීම වගේ දේවල් වල දී පවා මිනිස් ශ්‍රමය ඉතා අවම වශයෙනුයි උවමනා වන්නේ. ඉතින් බොහෝමයක් මිනිසුන්ට රැකියා සඳහා ඉතිරි වන්නේ අනෙත් ප්‍රධාන අංශ දෙකෙන් විතරයි. ඒ කිව්වේ නිර්මාණශීලි හැකියාව (උදා: කලාව, නව නිපැයුම්, දාර්ශනික)ප්‍රයෝජනයට ගන්නා රැකියා ක්ෂේත්‍ර සහ තාර්කික විශේෂඥ දැනුම අවශ්‍යය රැකියා ක්ෂේත්‍ර.

ඇයි මෙහෙම වෙන්නේ?

දැනට අපි දන්නා කියනා බොහෝ රැකියා පරිගණක හෝ යන්ත්‍ර මගින් සම්පූර්ණයෙන්ම වාගේ ස්වයංක්‍රීයව සිදු කරනවා. මෙයින් අදහස් කරන්නේ මෙම රැකියා ⁣ලොකයෙන් තුරන් වී යනවා කියන දේ නෙමෙයි. නමුත් මේ ක්ෂේත්‍රයන්ගේ අද දකින්න ලැබෙන ප්‍රමාණායේ මිනිස් ශ්‍රමයක් ඉදිරියට අවශ්‍ය වෙන්නේ නැති වීමයි.
උදාහරණයක් ලෙස ගිණුම් තැබීමේ සිට වසර අවසාන ගිණුම් වාර්ථා සකස් කිරීම, ගිණුම් කරණය සඳහා අදාල ගොඩක් නීතිමය උපදෙස් පරිගණකයෙන්ම පමණක් සිදු කර ගත හැකියි. දැණටමත් මේක ආරම්භ වෙලා ඉවරයි. කුඩා පරිමාණයේ සිට ලොව විශාලතම ආයතන සඳහා ගිණුම් කරණ කටයුතු දැන් දැන් මෘදුකාංග තම අතට අරගනිමිනුයි ඉන්නේ. ගිණුම් කරණ කෘතිම බුද්ධි වැඩසටහන් සහ ඒවායේ නීතිමය ගැටළු සඳහා අවශ්‍ය විශේෂඥ සහය සඳහා ඉහල මට්ටමේ රැකියා තව දුරටත් පවතීවි. මේ තත්වයම අනෙකුත් ක්⁣ශේත්‍ර සඳහා ද ඒ ඒ ක්ශේත්‍රයේ සොභාවය අනුව අඩු වැඩි වශයෙන් බලපානු ඇත.

ප්‍රවාහණ

ඔබ හිතනවා ද? මේ වාහන සහ ජනගහනය වැඩි වෙන වේගයට අනාගතයේ දී ලොකු ප්‍රවාහණ අර්බුධයක් හට ගනීවි කියලා? මහා මාර්ග ප්‍රමාණය මදි වේවි කියලා? නෑ. එහෙම වෙන්නේ නම් නෑ. මේ ප්‍රශ්නය තව දශක දෙකක් පමණ තියේවි. එම දශක දෙකක කාලයට පසුව එන දශක දෙකේ දී ක්‍රමයෙන් මේ ගැටළුව පහව යාවි. ඒ කිවවේ 2061 වෙනකොට ගොඩක් දුරට මහා මාර්ග භාවිතා කරන්න මිනිස්සුන්ට ඕන වෙන එකක් නෑ. ඇයි මම එහෙම කියන්නේ. ඒ කාලය වන විට දැනට වඩා ගොඩක් ප්‍රවාහණ ක්‍රම දියුණු වෙලා තියේවි. තව පුද්ගලික (මිනිසුන් ප්‍රවාහණය කරන) Drone භාවිතය ඉහළ යාවි. ඔය ඔක්කෝටමත් වඩා මිනස්සුන්ට ප්‍රවාහණ අවශ්‍යතා ගොඩක් දුරට නැති වේවි. ගොඩක් දේවල් ගෙදර ඉඳන්ම කරගන්න නිසා. එදිනෙදා අවශ්‍යය තාවයන්ට මාර්ග භාවිතා කරමින් පාරේ රස්තියාදු වෙන මිනිස්සු අනාගතයේ ඉන්න එකක් නෑ. සංචාරයට, හදිසි අවශ්‍යයතාවයන්ට වගේ සීමා සහිත අවශ්‍යතාවයන්ට මිනිස්සු ප්‍රවාහණ සේවා භාවිතා කරාවි.

ඔය කියන විදියට මිනිස්සුනට කරන්න රස්සා නෑනේ?

නෑ සහ ඔව්. මීට වසර 30කට පෙර (1980–1990)අද බහුතරයක් දෙනා කරන රැකියා ගැන මිනිසුන් අහලාවත් තිබුනේ නෑ. ඒ වගේ නව රැකියා අවශ්‍යයතා බිහිවෙනවා. ඒත් මේ අලුතින් බිහිවෙන හැම රැකියාවක්ම වගේ යන්ත්‍ර හෝ පරිගණක මෘදුකාංග මගින් සිදු කළ නොහැකි නිර්මාණාත්ම සහ තාර්කික චින්තනයට සම්බන්ධ රැකියාවන් ඉතිරිවේ. මිනිස් ශ්‍රමය ඇති රැකියා නම් ඉතාමත් අඩු වේවි. මේ හේතුව නිසාම විරැකියාව වැඩි වීමක් අනිවාර්යෙන්ම සිදුවේවි.

විරැකියාව වැඩි වුනොත් සමාජය පවතින්නේ කොහොම ද?

මේකට තියෙන එක විසඳුමක් තමයි රජය විසින් පුරවැසියන්ට වියදමට සල්ලි ලබා දෙන ක්‍රමයක් සකස් කරන එක. ඒ හැර විකල්පයක් දැනට නම් සොයාගෙන නෑ සමහර විට තව අවුරුදු 30ක් 40ක් තියෙන නිසා වෙනත් විකල්පයක් හොයාගන්නත් බැරි නෑ. නමුත් දැනට ලොව ප්‍රභලතම බලපෑමක් සිදු කරන නව නිපැයුම් කරුවෙක් වෙන Tesla Electric Vehicle, PayPal, SpaceX ආ දී වැඩ සටහන් වල පුරෝගාමියෙක් වුන Elon Musk සඳහන් කරන්නේත් රජය විසින් පුරවැසියන්ට මුදලක් ගෙවීමට සුදුවිය හැකි බවයි.

බලශක්තිය

අභ්‍යාවකාෂ ගමන් වලට ගුවන් යානාවලටත් සම්පූර්ණයෙන්ම විදුලිය මත හෝ හයිඩ්‍රිජන් එන්ජින් ආදෙශ කළ නොහැකි විශාල යන්ත්‍ර සූත්‍ර පමණක් පොසිල ඉන්දන භාවිතා කරන්නේ. බලශක්තිය තව දුරටත් සාමාන්‍ය ප්‍රශ්නයක් නෙමෙයි. නමුත් තව දුරටත් අභවකාෂ ගමන්, ගවේශණ කටයුතු යුධමය කටයුතු අාදිය සඳහා බලක්ශතිය කාර්‍යක්ෂමව ලබා ගැනීමේ ක්‍රම සොයා යෑම නවතින්නේ නම් නෑ. මිනිසුන් මේ විශ්වයේ කොතැනක සිටියත් බලශක්තිය පසුපස්සේ යාවි…

දරුවන් වැදීම

60–70% අතර දරු උපත් තෝරාගත් ජාන සංයුතියක් තුල දී සිදු කෙරෙනු ඇත. මෙහෙදී ප්‍රවේනියෙන් ඇති විය හැකි රෝඝාබාද අවම කිරීම මූලික අරමුණ වෙයි. ඊලඟට දරුවන්ගේ සහජ දක්ෂතා සඳහා දෙමාපියන්ගේ කැමැත්ත ද සලකා බැලෙනු ඇත. තව දුරටත් සාමාන්‍යය ක්‍රමයට දරුවන් ගැබ් ගන්නා අවස්තා ඇති වුවත් ඉදිරි වසර 100 ඇතුලත මේ ප්‍රතිෂතය ඉහළ යනු විනා පහල යාමක් බලා පොරොත්තු විය නොහැක.

වෛද්‍ය විද්‍යාව

නැනෝ තාක්ෂණයේ ද කෘතිම බුද්ධියේ ද සහය ඇති නිසා මිනිසුන්ගේ සෞඛ්‍ය තත්වය ඉහලට යනවා. ඒ වගේම වයසට යාමේ වේගය අඩු කිරීමේ ක්‍රම නිසා මිනාසාගේ සාමාන්‍ය ආයු අපේක්ෂාව වසර 100ට ආසන්න වේවි. තව දුරටත් මිනිසුන් තමංගේ සන්නිවේදන ඉන්ද්‍රියන්ගේ සීමාවන් ශරීරය තුලට ඇතුලු කරණ නැනෝ උපාංග හරහා දියුණු කිරීමට පෙලබෙනවා. කෙසේ වෙතත් සමහර දියුණු කිරීම් සඳහා රජයන් විසින් සීමා ඇති කෙරෙනු අතර ඒවා භාවිතා කිරීම රාජ්‍ය ආරක්ෂක අංශයන්ට පමණක් සීමා වෙනු ඇත.
බොහෝමයක් අවයව වෛද්‍යාගාර තුල නිපදවිය හැකි වේ. කෙසේ වෙතත් මේ සඳහා වැය වෙන වියදම තවමත් අදික නිසා, ආදායම් අඩු පුද්ගලයන් තවමත් පැරණි ක්‍රම භාවිතා කරනු ඇත.
අතක් පයක් අනතුරකින් නැති වුවහොත් නැවත එය ශිරීරය තුලින්ම වර්ධනය කරගැනීමේ ක්‍රමය බොහෝ දුරට මේ කාලය වෙන විට සම්පූර්ණ වී ඇති. එහෙත් තවමත් ඒ සඳා සැලකිය යුතු කාලයක් ද වේදනාවක් ද විඳීමට සිදුවීමට විකල්පයක් සොයන්න තව කල් යාවි.

දේශපාලනය

දේශපාලනිකව රජයන්ට වඩා ආයතන බලවත් බවක් පෙන්වාවි. මේ හේතුව නිසා මේකට විරුද්ධව හඬ නගන පිරිසක් ඇති වේවි. ඔවුන්ට අපි resistance ලෙස නම් කරමු. කොහොම වුනත් අති මහත් බහුතරය නව ක්‍රමයට අනුගත වී ඇති බැවින් resistance ලා ගේ මතවාදය ජයග්‍රහණය කරන්නේ නම් නෑ. නමුත් ඔවුන් සෑහෙන දුරට නව තාක්ෂණික යුගය මගින් ඇති කරන ජීවන රටා වෙනුවට සොභාවික ජීවන රටාවක් අනුගමණය කරන වෙනමම Cult එකක් ලෙස සාමකාමීව සමාජය තුල ජීවත් වෙනු ඇති.

වැදගත් කියලා හිතෙනවානම් අත්පුඩියක් ගහලාම යන්න.

Monday, November 6, 2017

ශ්‍රී ලංකාවේ commercial Advertisements, උමාරියා සහ තවත් දේ..

Genius Facebook සමාජයේ ගියපු කතාබහක දී සටහන් කරපු මගේ අදහස් කිහිපයක් එකතු කරලා සටහන් කරන්න හිතුනා.


ලංකාවේ වෙළඳ දැන්වීම් ක්ෂේත්‍රය සෑහෙන දුරට ඉදිරියෙන් ඉන්නවා. කෙනෙක්ට හිතෙන්න පුළුවන් සමහර අන්තර්ජාතික ඉන්දියානු Advertisement එක්ක අපේ ලංකාවේ ඒවා එතරම් නිර්මාණාත්මක නෑ කියලා. එහෙමත් නැත්නම් සිත්ගන්නා සුලු නෑ කියලා. ඒත් ඇත්ත තත්වය ඊට වෙනස්.

ගොඩක් වෙලාවට චාටර් වගේ පේන ඇඩ් පවා එහෙම කරලා තියෙන්නේ යම් අරමුණක් ඇතුව. උදාහරණ යකට “හාක්‍රෝස් පටාස්”, “දුන්න සිද්ධාලේප අසමෝදගම්” වගේ බැලූ බැල්මට මෝඩයි වගේ පේන ඒවා පවා.
වෙළඳ දැන්වීමක ප්‍රධානම පරමාර්තය උසස් කලා නිමාණයකට වඩා අදාල සන්නාමය මිනිස්සුන්ගේ හිත් ඇතුලේ පැල කිරීමයි. වෙළඳ දැන්වීමක සාර්ථකත්වය මනින්න ඕන එහෙමයි.

ශ්‍රී ලංකාව තුල වෙළඳ දැන්වීම් නිසාම ඉහල තැන්වලට ගියපු සන්නාමයන් බොහෝමයක් තියෙනවා. S-lon, Anchor, EGB වගේ දැන්වීම් නම් කියනකොටම ඔබට මතක්වෙනවා ඇති.

Anchor කිරි වලට එරෙහිව තහනම් නියෝග වැටිලා නඩු වැටිලා ඔවුන්ගේ සන්නාමය මිනිසුන් අතර ජනප්‍රියත්වයෙන් අඩුවෙලා ගියා මතක ද?

අමතක නම් මතක් කරගන්න මේවා ටිකක් කියවලාබලන්න.

ඒත් තවමත් බහුතරයක් දෙනා මිලදී ගන්නේ Anchor කිරිම තමයි. කොහොමද මේ අය මේක කළේ?
ඔබට මතකද ඉස්සර ඇන්කර් එකේ ටැග් ලයින් එක?

“නවසිලන්තයේ පිරිසිදු දෙනුන්ගෙන දොවාගත් නැවුම් එළ කිරි”

මතක් කරගමු එකක් බලලාම. :)


It’s New Zealand, Where the best quality milk is made

තහනම් නියෝග ආදියෙන් සන්නාමය ගැන තිබ්බ විශ්වාස පලුදුවුනාට පස්සේ ඔවුන් මාස 6ක්විතර Advertisement කරේම නෑ. හිමීට අමතක වෙන්න ඇරියා(හිතා මතා හෝ ඒ අවස්තාවේ වෙන කරන්න දෙයක් තිබුනේ නැති කමට වෙන්න ඇති) . නමුත් පස්සෙ ආව හිමීට ඇන්කර් යෝගට් වලින්. දැන් වැඩි පුර මාකට් කරන්නේ යෝගට් එක. මොකද යෝගට්? යෝගට් හදන්නේ අපේ රටේ කිරිවලින්. දැන් උජාරුවට කියනවා මේ අපේ රටේ කිරි කියලා. මෙච්චර කල් නවසීලන්තය උඩ දාපු සමාගමතමයි. මේ දැන්වීම් අතර කියවුනු වචන “අම්ම දන්නවා ද? මේ අපේ…ම කිරි”, “අපේම රටේ… නැවුම් එළකිරි”.
දැන් ඇන්කර් කිරිඇඩ් එකක වුනත් නවසීලන්තය කියන වචනය ඇහෙන්න තියෙනවා ද?
පොඩ්ඩක් මතක් කරගන්නත් එක්ක බලමු මේ දැන්වීම.


අම්ම දන්නවා ද? මේ අපේ…ම කිරි


ඊට පස්සේ මෙයාලා ලංකාවේ Iconic කෙනෙක් ගන්නවා සන්නාමය ඉස්සරහට ගෙනියන්න. එයා තමයි උමාරියා. උමාරියා වැදගත් වෙන්නේ එයා අමරදේව එක්කත් සිංදු කියපු (https://youtu.be/fuJRbIFjWfY), නව පරපුර හිත් දිනාගත්ත කෙනෙක් නිසා. ඔන්න අමරදේව ඔළුවේ උඩම තියන් ඉන්න මනුස්සයෙක් වුනත් හිතනවා අමරදේව සිංදුවක් කියන්නෑ එසේ මෙසේ කෙනෙක් එක්ක හොඳට හිතලා තමයි කියන්නේ කියලා. ඉතින් ඒ අතිනුත් උමාරුයා තමාගේ ප්‍රොෆයිල් එක හදාගෙන ඉවරයි.
උමාරියාගේ මියුරු හඬින් ඇසෙන Anchor ගීතය මෙන්න… රස විඳලාම ඉතිරිටික කියවමු.



නිල් තළබිමේ, ලා හිරු එළියේ…

ඔය Anchor උදාහරණය ලංකාවතුල සිදුවෙච්ච ඉතාමත් සාර්ථකම Advertisement campaign එකක් ගැන පෙන්වලා දෙන්නයි.
ඒ වගේම Fail වෙච්ච තැන් නැත්තේම නෑ. මේ මෑත කාලයේ මට මතක්වෙච්ච උදාහරණයක්.
Melwa තද කැම්පේන් එකක් කරනවා මේ දවස්වල. ඇත්තටම මෙල්වා සන්නාමය හඳුන්වලා දීලා වැඩි කාලයක් නැති වුනත් ඒ සන්නාමය දන්නෙ නැති කෙනෙක් නැති තරම් දැන්. ඒ අතින් ඉතාම සාර්ථකයි ඔවුන්ගේ දැන්වීම් මගින් සිදු කරන්න හදපු දේ. ඒක කෙහොම වුනත් ඔවුන්ට වැරදුන තැනක් තිබ්බා.
ඊට කලින් මේ සුන්දර Melwa තේමා ගීතය අහලා (නරඹලා) ඉමු නේ ද?

දැන් Melwa දැන්වීම් දරුණුවටම යන අස්සේ දාන්න ගත්තා අයියෝ වැරදි එකක් අරන් තියෙන්නේ කියලා කනගාටුවෙලා ඒක මේ අකුරුතුනේ පටැලැවිල්ලක් කියලා පෙන්වාල දීලා “M E L W A නම බලලම ගන්න” කියලා කියන. ඉතින් මාත් හෙව්වා මොකක්ද මේ අකුරු තුනේ පටලැවිල්ල කියලා. බැලින්නම් Melbourne දැන් මොකක්ද Fail එක? Fail එක තමයි Melwa නොමිලේ Melbourne මාකට් කරලා දීම Melwa දැන්වීම ඇතුලේම.

මේ සමාගම් දෙකෙන් මුලින් පටංගත්තේ මොකක්ද කියලා මම හරියට දන්නෑ. නමුත් පැහැදිලිවම Melwa දැන්වීම් තුලින් නොමිලේම Melbourne Market වෙනවා දකින්න පුළුවන්. Melwa එකේ අකුරුතුනේ පටලැවීම ගැන කියන්න ගත්තාට පසුව Melbourne එකෙන් යාන්තමට තමාගේ සන්නාමය ගැන හඳුන්වා දීමක් කරනවා. හරියට අර අකුරු තුන අපේ කියනවා වගේ එකක්. පැහැදිලිවම Melbourne එකෙන් Melwa තරම් ලොකු බජට් එකක් නැතුව ඔවුන්ගේ Campaign එක Hijack කෙරුවා කියන්න පුළුවන්.


Melbourne ගැන නොදැන සිටි මමත් ඒක ගැන හොයන්න ගත්තේ Melwa එකෙන් දාපු දැන්වීම නිසාම තමයි.
මේ සටහන මාගේ පුද්ගලික අදහස්ය. වැරදීම් තිබෙන්නට හැක. මම කිසිදු සන්නාමයක් අපහසුතාවයට පත්කිරීමට මෙයින් අදහස් නොකරමි. වෙළඳ දැන්වීම් කලාවේ මා දකින ආකර්ෂණීය දේවල් ටිකක් ඔබ සමග බෙදා ගත්තා පමණි. වෙළඳ දැන්වීම් වල මොනවා තිබුනත්, විචාර බුද්ධියෙන් යුතුව තමා මිලදී ගන්නාදේ මිල දී ගැනීමට අපි පරිස්සම් විය යුතු බවත් මතක් කරමි.

Tuesday, March 14, 2017

ශ්‍රී ලංකාවේ අධ්‍යාපනය

දැනුම යනු සජීවි දෙයකි. මේ සජීවී දැනුම පරපුරකින් තවත් පරපුරකට සාර්ථකව සංක්‍රමණය කරගැනීමේ ක්‍රමවේදය “අධ්‍යාපනපනය” යි.
අධ්‍යාපනය යන වචනය මම භාවිතා කරන්නේ ඒ අර්ථයෙනි. මෙම දැනුම් පද්ධතිය ඉගනගෙන භාවිතා කරන මානවයෝ ද සජීවි වෙති. ඔවුන් එකිනෙකාගෙන් ආකල්පයන්ගෙන් ද බුද්ධියෙන් ද පරිකල්පන ශක්තියෙන් ද සම්පූර්ණයෙන් වෙනස්ම වූ අය වෙති. එවන් පිරිසකට සජීවී දැනුම වැඩි ඵලදායි තාවයකින් ඉදිරි පරපුරට ගෙන යෑම තමා වඩාත් සාර්ථකම අධ්‍යාපනපනය ක්‍රමවේදයකින් සිදුවිය යුත්තේ. අධ්‍යාපන ක්‍රමවේදය සකස් විය යුතු යැයි මා සිතනා කරුණු කිහපයක් ගැන මේ ලිපියේ ඉදිරියට සාකච්චාවට ගැනෙනු ඇත.
අදහස් හුවමාරු කර ගැනීමේ පහසුවට මම දැනට අපි භාවිතා කරන පාසැල් අධ්‍යාපන වසර ක්‍රමය සහ පෙර පාසල් ක්‍රමය උදාහරණයට ගන්නවා. ඒ ඒ ක්‍රමයන් වයස් කාන්ඩ තුල දැනට පවතින දුර්වලතා සහ ඒවා වෙනුවට යෝජනා කරන නව වැඩ පිලිවෙල ගැන ද පිලිවෙලින් සඳහන් කරමි.

පෙර පාසල් අධ්‍යාපනය

වයස අවුරුදු (3/)4/5 කාලයේ දී බොහෝ දරුවන් පළමුව විදිමත් අධ්‍යාපනයකට යොමුවීම ආරම්භ කරන්නේ පෙර පාසල් හරහා ය. ශ්‍රී ලංකාව තුල පෙර පාසල් අධ්‍යාපනය ලැබිය යුතුමය කියා නියමක් නැති වුවත් බොහෝ දෙමා පියන් තම දරුවන් පෙරපාසලකට ඇතුලත් කර ගැනීමට උනන්දුවක් දක්වයි. එසේම ශ්‍රී ලංකාව තුල පෙරපාසලක තත්වය ගැන රජය මගින් නියාමනය කරන නීති පද්ධතියක් ඇතත් එය සජීවීව පාලනය වෙනවා ද යන්න තවත් ගැටළුවකි. එය පසකින් තබමු. පෙර පාසල් කාලය තුලදී දරුවන් තුල පෞරුෂය වර්ධනය කිරීමට මුල් තැන ලබා දිය යුතු ය. මනෝ විද්‍යාත්මක අධ්‍යයනයන් අනුව වුව ද දරුවා තමා ගැන තක්සේරුවක් කිරීම ආරම්භ කරන්නේ මේ කාලය තුල ය. මෙහිදී දරුවා තුල තමාට කළ හැකි ය, තමා දක්ෂය යන හැඟීම ජනිත කළ යුතු ආකාරයට පෙර පාසල් ක්‍රියාකාරකම් සංවිධානය කළ යුතු ය. මෙය දරුවාගේ මුළු ජීවිතයටම වැදගත්ම වූ අංශයකි. දරුවන් බොහොමයක් තුල දැනට ජනිත කරන්නේ තරඟ කාරීත්වයි. ඒ තරඟ කාරීත්වය තුලින් කුහකත්වය හීන මානය සහ අතිමානය වගේ හැඟිම් දරුවන් තුල ජනිත කරයි. අධ්‍යාපනයේ ආරම්භක අවදියේම අනාගතයේ බිහිවෙන්නට සිටිනා ශ්‍රේෂ්ඨ මිනිසුන් අපේ මෙසේ තව දුරටත් මරා දමමු ද?
සෞන්දර්‍ය, කතාන්දර කවි ගී ගායන ය, කන්ඩායම් ක්‍රියා කාරකම්, දෑත හුරු කිරීම(පැන්සල , කතුර,…) ආදිය දැනට ද සිදුවන ඉදිරියට ද කරගෙන යා යුතු ක්‍රියාකාරකම් ය. දැනට පෙර පාසල් අධ්‍යාපනය තුල දී ප්‍රායෝගිකව මා දකින එක් දුරුවල කමක් වන්නේ පෙර පාසල් දරුවන්ට අකුරු ලිවීමට හුරු කරවීම යි. ශ්‍රී ලංකාවේ අධ්‍යාපන ක්‍රමය තුල පෙර පාසල් දරුවන්ට අකුරු ලිවීමේ හැකියාව ඇති අය බිහිකරනවා කියලා සලකන්නේ නැත. යම් ලෙසකින් පෙරපාසල් දරුවන්ට (අවු. 6 ට අඩු) අකුරු ලිවීම කියවීම සිදු කළ යුතු යැයි විද්වතුන් විශ්වාස කරන්නේ නම් ඒ සඳහා නිවැරදි ක්‍රම වේදයක් පාසැල් අධ්‍යාපනයට ද සමගාමීව ඇතුලත් කළ යුතු ය. ලංකාවේ සමහර පෙර පාසලක සිංහල අකුරු ලියන්න උගන්වයි. තවත් පෙර පාසලක ඉලක්කම් පමණක් උගන්වයි. තවත් පෙර පාසලක සිංහළ සහ ඉංග්‍රීසි භාෂා දෙකම උගන්වයි. නමුත් එක වසර නිර්දේශය සකස් කර ඇත්තේ පංතියට ඇතුලත් වන සිසුවා අකුරු ලිවීමට නොදැන සිටී යන උපකල්පනය තුල ය. තමා දැනටම ලිවීමට දන්නා අකුරු 1 වසරේ ගුරුතුමා/ගුරුතුමිය නැවත කියා දෙන විට මේ ගැන දරුවා මානසික අර්බුදයකට පැන නැගිය හැක. අනෙක් අතට පාසල් අධ්‍යාපනය තුලදී ගුරුවරයා තමා දන්නා දේම කියනා අලුත් දෙයක් නොදන්නා පුද්ගලයෙක් යන හැඟීම දරුවා තුල ඇති කිරීමටත් හේතුවක් විය හැක.
පෙර පාසල් අධ්‍යාපනය තුල දී දරුවාගේ පෞරුෂත්වය වර්ධනය කිරීම සඳහා කතාන්දර, ක්‍රියා කාරකම් ආදිය සිදු කළ හැකි ය. පුදගලිකව පාසලේ අනෙක් දරුවන්ට වඩා කුඩා ශරීරයකින් යුතු මා ගැන තිබූ හීන මානය දුරු කිරීමට හීන් සැරය මට උදව්වුනි. දරුවන්ට කියා දෙන කතාන්දර ඔවුනගේ අනාගතයට ගැඹුරින් බලපෑම් සිදු කරයි. ගුරුවරුන් සහ අධ්‍යාපන නිර්දේශ සකස් කරන අය ගැන මේ කරුණ ගැන සුළු කොට නොතැකිය යුතු ය.

ප්‍රාථමික අධ්‍යාපනය

1 වසරේ සිට 5 වසර දක්වා ප්‍රථමික අධ්‍යාපනය සම්පූර්ණයෙන්ම වාගේ වෙනස් විය යුතු ය. 1 සහ 2 වසර ලිවීම, කියවීම සඳහා ද සමාජ ආචාර ධර්ම හුර කරවීමට ද මූලිකත්වය දිය යුතු ය. දැනට පවතින ක්‍රමය තුල දරුවා තරඟයකට යොමු කිරීම හැර අනෙකක් සිදු නොවේ. 5 ශිෂත්වය ද සම්පූර්ණයෙන් ඉවත් කළ යුතු පිලි දරුවාගේ නිරමාණශිලීත්වය, තර්කනය, ස්වාධීනත්වය ගොඩනගා ගන්නා කාලය තුල තරඟ විභාගයන්ට යොමු කිරීම ම අපරාදයකි. පාසල් පද්ධතිය සම මිතිකව පවත්වන්නේ නම් පාසල් අතර අධ්‍යාපන මට්ටම සමාන මට්ටමකට ලබා ගනී නම්, උසස් පාසල් හෝ පහත් පසල් කියා වෙනසක් නැති නම් ශිෂත්ව විභාගයක් ද අපට අනවශ්‍යය.
මා මුලින් සඳහන් කළාක් මෙන් දරුවන් විවිද යි. හැකියාවන් විවිද යි. සමහර විට දරුවන් තුල ඇති හැකියාවන් මතු වන්නේ කලක් ගොසිනි. අධ්‍යාපන රැල්ලට ගසාගෙන ගොස් එක තැනක නැවතී නැවතත් ආපසු හැරී තමා ගේ ජීවිතය මුල සිට සොයන වැඩි හිටියන් අද අප අතර බහුලය. එයට වග කිව යුතු වන්නේ මේ නිසි හැකියාව සංවර්ධනය කිරීමට ඉවහල් නොවන තරඟ කාරී අධ්‍යාපන රටාවයි. තරඟය නරක යැයි නොකියමි. නමුත් ප්‍රාථමික අංශයේ අධ්‍යාපනය තමා තරඟ කිරීමට වඩා දක්ෂම ඉසව්ව ගැන දරුවාටම තේරුම් ගැනීමට උදව් කරන අවදියක් මිස තරඟයට සුදුසු අවදියක් නොවෙයි.
“අඩුම තරමේ වාර විභාගයක් නොමැතිව දරුවන්ට කෙසේ නම් ඇගයීමට ලක් කරන්නේ ද?” මෙලෙස ඔබට සමහර විට සිතුනා වන්නට පුළුවන. ලොකුම ගැටළුව විවිද හැකියාවන් සඟවාගෙන සිටිනා දරුවන් රාශියකට එක වර ඉගැන්වීම් කාර්‍ය සිදු කිරීමයි. මේ ක්‍රමය මගින් උපරිම ප්‍රයෝජන ගත නොහැකි බව නැවත නැවතත් ඉතිහාසය තුල අප අත් දැක ඇති දෙයකි. වර්ථමාන අධ්‍යාපන ක්‍රමය මාලුවන්ට ගස් නගින්නට උගන්වන ක්‍රමයක් බව ඇතැමුන් ප්‍රකාශ කරන්නේ මේ හේතුවෙනි. මේ පින්ලන්තය විසින් වඩා සාර්ථක ක්‍රමයක් අත්හදා බලා ඇත. ඒ දරුවන්ට ප්‍රයෝගික ක්‍රමයට දැනුම ලබා දීමයි. මේ ක්‍රමයේ දී ගණිතය පරිසරය විද්‍යාව ආදී ලෙස විශයන් වෙන් කිරීමක් සිදු නොකරයි. එහෙත් ඉගැනුම් පරිසරය තුල දරුවා ඒ ඒ විශයන් ස්වයන් ක්‍රීයම ඉගන ගනී. ඔවුන් ගණිත මූල ධර්ම ඉගන ගන්නේ තමා ගණිතය ඉගන ගන්නා බවවත් නොදැනයි. අපහැදිලියි වගේ ද? උදාහරණයක් අරන් බලමු, ගුරුවරයා Benjamin Franklin ගැන ඉතිහාස කතාවක් දරුවාට කියා දෙයි. ඔහු සිටි කාලය ගැන, ඒ කාලයේ දේශපාලන වාතාවරණය ගැන දරුවන්ට කියා දෙයි. ඒ අතරම ඔහු කරන ලද පරීක්ෂණ ගැනත් ඔහු විසින් නිර්මාණය කරන ලද ජල තරංග සංගීත භාන්ඩය ගැනත් කියා දෙයි. මේ කතාව තුල ඉතිහාසය ද විද්‍යාව ද තරමක් දුරට සංගීතය ද ඇතුලත් වෙයි. තවත් උදාහරණයක් ගමු, දරුවෙකුට අවන්හලක ක්‍රියා පටිපාටය ගැන දරුවන් දැනුවත් කරයි. සමහර විටක අවන් හලකට දරුවන් රැගෙන යයි. මෙහිදී සේවකයන් ගණුදෙනු කරුවන් සමග කතා බහ කිරීම ආචාර ශීලීත්වය වැනි දේවල් ගැන අවබෝධයක් දරුවා ලබා ගනී. අවන්හලේ මුදල් අය කැමිට මුදල් ලැබෙන සැටිත් ඔහු ඒවා පරිගණක ගත කරන සැටිත් ඒම දත්ත මගින් වසර අවසානයේ රජයට බදු ගෙවන සැටිත් දරුවා ඉගන ගනී. ඒ අතර සමහර විට මේ අවන්හලින් ණයට ගනු දෙනු සිදු කරන ආකාරය ගැන දරුවා ඉන ගනී. ණය ගෙවන සැටිද ඒවාට අදාල ගණිත කොටස් ඒ අතර ඔවුන් ඉගන ගනී.
මේ ක්‍රමය ඒ ඒ දරුවාගේ දක්ෂතාවය අනුව විවිද සිද්ධාන්ත සහ මූල ධර්ම දරුවා ඉගන ගනී. ඒ තුල ගණිතය. සන්නිවේදන හැකියාව. මෙන්ම සමාජයේ ජීවත් වීමේ අත් දැකීම් ද දරුවා ලබා ගනී. මේ ක්‍රමය ගැන වැඩි විස්තර මෙතනින් ඔබට බලා ගත හැක.

ද්විතීය අධ්‍යාපනය

කණිෂ්ඨ ද්විතීය අධ්‍යාපනය(6 වසරේ සිට 9 වසර දක්වා)

නැවතත් විශයන් ලෙස වෙන් කර ඉගැන්වීම කණිෂ්ඨ ද්විතීය අධ්‍යාපනය දී සිදු කිරීමට සිදුවෙයි. තරඟ විභාගයක් නොවුනත් මෙහි දී ඇගයීම් ක්‍රමවේදයක් අවශ්‍යය වෙයි. කණිෂ්ඨ ද්විතීය අධ්‍යාපනයේ දැනට පවතින ක්‍රමය තුල ලොකු අඩුපාඩුවක් මා දකින්නේ නැත. නමුත්, නව විශයන් හඳුන්වා දීම සිදු කළ යුතු ය. උදාහරණයකට තොරතුරු තාක්ෂණය විශයක් ලෙස තුලට ඇතුලත් කළ යුතු යැයි මා සිතන අතර පරිගණක ක්‍රමලේකන භාෂාවන් ගැන, පරිගණක ආරක්ෂාව, පරිගණක භාවිතයේ ආචාරධරම ආදීය විශය නිර්දේශයට අන්තර්ගතව තිබිය යුතු ය.

ජ්‍යෙෂ්ඨ ද්විතීය අධ්‍යාපනය(අ.පො.ස. සාමාන්‍ය පෙළ - 10 සහ 11 වසර)

දැනට පවතින ක්‍රමයෙන් වශේෂ වෙනස් කමක් සිදුවිය යුතු යැ යි නොසිතමි. කණිෂ්ඨ අංශයේ මෙන්ම මෙහි දී ද විශයන් යාවත් කාලීන වීම සිදුවිය යුතු ය. එසේම බහු-මාද්‍යය, අන්තර්ජාලය ආදිය ඉගැන්වීම් කටයුතු වලට සක්‍රීය භාවිතයට ගත යුතු ය.

ජ්‍යෙෂ්ඨ විද්‍යාල — High School (අ.පො.ස. උසස් පෙළ — 12 සහ 13 වසර)

උසස් පෙළ සඳහා ශ්‍රී ලංකාව තුල විශේෂ අවධානයක් සිදු කළ යුතු කාල පරිච්චේදයකි. විශ්ව විද්‍යාල සඳහා ඇතුලත් කර ගැනිමේ ප්‍රධානතම තරඟ විභාගයක් ලෙස ද උස්ස පෙළ හැඳින්විය හැක. ශ්‍රී ලංකාවේ පාසල් පද්ධතිය තුල අසමමිතික සම්පත් බෙදී යාමේ ගැටළුව නිසා වැඩිම අසාධාරනයක් ලක්වන්නේ උසස් පෙළ සිසුන්ටයි. විශ්ව විද්‍යාල පහසුකම් සීමාසහිත බැවින් සහ රජයේ විශ්ව විද්‍යාල අධ්‍යාපනය ගැන ජනතාව තුල ඇති විශ්වාසය ද පිලිගැනීම ද හේතුව‍ෙන් විශ්ව විද්‍යාල අධ්‍යාපනය ලබා ගැනීමට ඇති ප්‍රධානතම කඩයිම වශයෙන් උසස් පෙළට හිමිව ඇති වැදගත්කම හේතු කොටගෙනම අමතර පංති ආදිය රැල්ලක් සේ පැතිර යයි. පවතින ක්‍රමය තුල ශිෂයන්ට ද මේ රැල්ල තුලින්ම ගොඩ ඒම විනා වෙනත් මගක් නැත. රජය අතින් සම්පත් ලබා දීමේ අපොහසත් බව, කළමණාකරනයේ දුර්වලතාවය, සුදුසු කම් ලත් ගරුවරුන්ගේ හිඟ කම ආදී කරුණු ගණනාවක් මේවාට හේතු වී ඇත. එසේම මේ තත්වය තුල ශිෂයන්ට සිදුවන අසාධාරනය වැලැක්වීමට z-score ලකුණු සඳහා දිස්ත්‍රික් පදනමක් එකතු කර ඇත. මෙසේ සිදු කිරීමට ප්‍රධානතම හේතුව සම්පත් නිසි ලෙස නොබෙඳිම නිසා අසාධාරනයට ලක්වන සිසුන්ට සාධාරනයක් කිරීම යි. එය එසේ වුවද සම්පත් බෙදීයාම දිස්ත්‍රික් මට්ටමින් ගැනීම එක් ප්‍රශ්නයක් විසඳිම සඳහා තවත් පිරිසකගේ අයිතිවාසිකම් පාවාදෙන අසාර්ථක ක්‍රමයකි.
දැනට පාසැල් පද්ධතිය තුලින් උසස් පෙළ ඉවත්කර උසස් පෙළ සඳහා පහසුකම් සහිත විශේෂ ජ්‍යේෂ්ඨ විද්‍යාල (High School) ශ්‍රී ලංකාව පුරා ඇති කිරීමට යෝජනා කරමි. මේ ජ්‍යේෂ්ඨ විද්‍යාල වැඩි ශිෂ්‍යය පිරිසකට එකවර අධ්‍යාපනය ලබා ගැනීමේ පහසුකම් සලසා දිය යුතු ය. එනම් දැනට පවතින පාසල් පද්ධතිය තුල 12 සහ 13 වසර ඉවත් කර ඒ සඳහා විශේෂ පාසල් පද්ධතියක් ඇති කිරීම යි. මෙය අමතර වියදමක් සහ අනවශ්‍ය කාරනයක් ලෙස ඔබට සිතීමට පුළුවන. නමුත් මෙය පාසල් කිහිපයකට පමණක් සීමාවී ඇති සම්පත් සඳහා සිසු දරුවන් වැඩි පිරිසකට භාවිතා ගැනීමට හැකි වීම පහසු කරන ආකාරයේ වැඩ පිළිවෙලකි. දැනට ශ්‍රී ලංකාව තුල උස්ස පෙළ විභාගය සඳහා වරකට පෙනී සිටින්නේ සිසුන් 300,000කට අඩු පිරිසකි. මෙම සිසු පිරිසට 2000 කන්ඩායම් ලෙස සිසු ඝණත්වයට අනුව ජ්‍යේෂ්ඨ පාසල් පිහිටුවා ඇතුලත් කරන්නේ නම් අපට අවශ්‍ය වන්නේ පාසල් 150ක් පමණි.
පාසැල් කාලය තුල දේශන වාරයකට සිසුන් 200ක් හෝ ඊට අඩු ප්‍රමාණයක් සහිත දේශන ශාලා සකස් කිරීම සිදු කළ යුතු ය. දැනට බොහෝ විට සිසු දරුවන් 80% ප්‍රතිශතය අවශ්‍ය බැවින් පාසලට පැමිණි යත් අධ්‍යාපනය ලබන්නේ එක වරකට සිසුන් 500/1000 හෝ ඊටත් වැඩියෙන් සිටිනා දේශන සාලවන් තුලිනි. වයසින් මුහුකුරා ගිය සිසුන් සඳහා තනි තනි වශයෙන් ගුරු අවධානය 100% අවශ්‍ය නැත. විශාල දේශන ශාලා තුල වැඩි සිසු පිරිසකට අධ්‍යාපනය ලබා දීම තුලින් වටිනා ගුරු සම්පත ද කළමණාකරනය පහසු වේ.
මෙම පාසල් සඳහා උසස් තත්වයේ ගුරුවරු අවශ්‍යය වන්නේ ද පාසල් ගණනට සමානුපාතිකව ඉතාමත් අවම වශයෙනි. සිංහළ ඉංග්‍රීසි සහ දෙමළ යන මාධ්‍යයන්ට වෙන් වෙන්ව ද එක් පංතියකට අවම සිසු ප්‍රමාණය ලෙස 100 ලෙස ද ගෙන, එක් ගුරු වරයෙකුට එක් වාරයක් තුල පංති 3ක් හෝ 4ක් සඳහා ඉගැන්වීම කළ හැකි බව ද සිහිතබා ගෙන ගුරු සම්පත කෙතරම් ඵදායී ලෙස මෙම ක්‍රමය තුල භාවිතා කළ හැකි දැයි ඔබම කල්පනා කර බලන්න.
දැනට පවතින විශය මාලාවන්ට අමතරව vocational training ආදිය ද මෙම විද්‍යාල තුලට ඇතුලත් කර යුතු ය. මේ මාර්ගයෙන් සමාන්‍යය පෙලින් අධ්‍යාපනය ලැබීම අත හැර වෙනත් මාර්ග වලිට අවතීර්ණ වීමට සිටින සිසුන්ගේ ශ්‍රමය ද රටට ඵලදායී ලෙස යොමු කර ගැනීමේ අවස්ථාව රටට හිමිවේ. තව දුරටත් දිස්ත්‍රික් මට්ටමින් උසස් පෙළට ඉදිරිපත් වන සිසු අනුපාතය සැලකිල්ලට ගෙන සමාන පහසුකම් සහිතව මෙම ජ්‍යේෂ්ඨ විද්‍යාල ඉදිකිරීම තුලින් විශ්ව විද්‍යාලයට ඇතුලත් වීම සඳහා දිස්ත්‍රික් පදනමක අවශ්‍යතාවය ද නැතිව යයි.
මේ ක්‍රමය තුල දී ප්‍රායෝගිකව ඇතිවන ලොකුම ගැටලුව සිසුන්ගේ නිවස සහ පාසල අතර පවතින දුරයි. පාසල් පිහිටවීමේ දී සිසු ඝණත්වය ගැන සැලකිය යුතු යැයි මා කලින් ලීවේ මේ කාරනාව නිසා ය. සමහර අවස්ථාවල දුෂ්කර ගම්මාන වල සිටිනා දරුවන්ට ද එකිනෙකට වඩාත දුරින් පිහිටි ගම්මාණයන් වෙනුවෙන් එක් ජ්‍යේෂ්ඨ පාසලක් පිහිටුවීම මූල්‍යමය වශයෙන් ද ප්‍රායෝගිකව ගත් කළ ද අපහසු කාර්‍යයකි. එවන් දරුවන්ට ජ්‍යේෂ්ඨ පාසල තුලම නැවතීමට පහසුකම් සැපයිය හැකි ය.

පරිපාලන ක්‍රමයේ සංශෝදන

සියළුම ප්‍රාථමික සහ ද්විතීක පාසැල් පරිපාලනය සඳහා අධ්‍යාපන අමාත්‍යංශයේ පාලනයට ගත යුතු ය. පලාත් සභා මගින් පාසැල් පරිපාලනය විම පරිපාලනයේ දී අසාර්ථක ක්‍රමයක් බව නැවත නැවත ඉතිහාසය තුල පසක් වී ඇත. එසේම අධ්‍යාපනය සඳහා කරන වියදම් නිසි ලෙස කළමණාකරණය කිරීම සැලසුම් සකස් කිරීම අධ්‍යාපන අමාත්‍යංශ යටතේ ඇති විට වඩාත් පහසුය. මහජන මුදල් අපතේ යෑම අවම කරයි.
උසස් අධ්‍යාපන සහ අධ්‍යාපන අමාත්‍යංශ නිසි ලෙස සම්බන්ධි කරණය කළ යුතු ය. මේ ආයතන දෙකටම නිරේදේශ ලබා දෙන විද්වත් කන්ඩායමක් ඇති කළ යුතු ය. මේ විද්වත් කන්ඩායමේ රාජකාරිය වන්නේ අධ්‍යාපන ක්‍රමවේදයන් ගේ කාලීන බව සහ ඵලදායි තාවය ගැන නිරන්තර අධ්‍යයනයන් සිදු කරමින් අවශ්‍ය සංශෝදන අදාල අමාත්‍යංශයට නිර්දේශ කිරීමත් එම නිර්දේශ අදාල අධ්‍යාපන අමාත්‍යාංශයන් මගින් ක්‍රියාත්මක කිරන ආකාරය ගැන ඇගයීමත් ය.
ජාතික පාසැල්, නවෝද්‍යා පාසල්, මහා විද්‍යාල, මධ්‍ය මහා විද්‍යාල, ආදි විවිද වර්‍ග කරණයන් පාසල් පද්ධතිය තුලින් ඉවත් කළ යුතු ය. කාලයෙන් කාලයට එක් එක් ගැටළු වලට විසඳුම් ලෙස හෝ දේශපානික උපක්‍රම ලෙස මේවා ගෙන ආව ද එමගින් සිදු වන්නේ අධ්‍යාපනයට හිමි විය යුතු පරිපාලන ශ්‍රමය අනවශ්‍යය ලෙස අපතේ හැරීමක් පමණි. තව දුරටත් මෙවන් වර්ගී කරණයන් තුලින් ජනතාවගේ සිතට ව්‍යාජ සහනයක්, චන්දය අරමුණු කරගත් මිනිසුන් නොමග යවන වෙනසක් ලබා දීම හැර අධ්‍යාපනයේ ගුණාත්මක භාවයට කිසිදු බලපෑමක් ඇති නොකරයි.
අධ්‍යාපනයේ ප්‍රමුඛතම පිරිස අධ්‍යාපනය ලබන අයයි. දෙවනුව ප්‍රමුඛතම පිරිස වන්නේ අධ්‍යාපනය ලබා දෙන ගුරු වරුන්ය. ගරු වෘතිය වෙනුවෙන් ලැබෙන වැටුප සම මට්ටමේ සුදුසු කම් සහිත පිරිසට ලබා දෙන වැටුප හා ගැලපූවිට ඉතාමත් අවම එකකි. අධ්‍යාපනයට GDP එකෙන් 6%ක් නොව 10% ලබා දුන්න ද ගැටළුවක් නැත. නමුත් සියල්ලට ප්‍රථමයෙන් කළමණාකරනයේ දුර්වලතා අවම කරගත යුතු ය. ප්‍රමුඛතා හඳුනා ගත යුතු ය. පාසල් භූමි නිසි ලෙස සංවර්ධනය කර පාසල් භූමිය භාවිතා නොකරන කාලයන් තුල දී පාසල් මගින් රජය මුදල් ඉපයීමේ ක්‍රම ගැන සිතිය යුතු ය. උදාහරණයකට ඉහත සාකච්ඡා කළ අන්දමට ජේෂ්ඨ විද්‍යාල 150ක් රජය සතුනම් රජය විසින් අංග සම්පූර් ශ්‍රවනාගාර 150ක් ඉදිකර ඇත. අංග සම්පූර්ණ නාට්‍ය ශාලා 150ක් රට පුරා ඉදිකර ඇත. සති අග විශේෂ වැඩසටහන් සඳහා පාසැල් භූමිය ලබා දීම මගින් ද ආදායම් ඉපයිය හැක.
අවසාන වශයෙන් කීමට ඇත්තේ “අපට අධ්‍යාපනය දියණු කිරීමට නැත්තේ මුදල් නොවෙයි. අවශ්‍යයතාවයයි.”

Saturday, October 29, 2016

ලංකාවෙන් පිට රටට යන සල්ලි නවත්තන්න එටිසෙලාට් සිම් එක කැඩුව නේ ද?

කමක් නෑ ඊට කලින් කරන්න තව වැඩ ටිකක් තියෙනවා. කැඩුවත් නැතත් මේ ටිකත් කරන්න පුළුවන් නම් අපේ රට ගොඩ දාගන්න පුළුවන්.

1. දුරකථන අංකයක් ව්‍යාපාරිකයන් වෙනස් කරන්න කැමති වෙන්නේ නෑ. ඔවුනට අදාල අංකය මිස ආයතනය මොකක්ද කියන එක නෙමෙයි. ඒක නිසා TRC එකට බල කරන්න ඕන Number Portability පහසු කම පාරිභෝගියන්ට ලබා දෙන්න කියලා. ඒ කිව්වෙ. අංකය වෙනස් නොකර ඩයලොග් වලින් මොබිටෙල් වලට හරි, එටිසෙලාට් වලින් ඩයලොග් වලට හරි මාරුවෙන්න තියෙන පොරිභෝගික අයිතිය නිත්‍යානු කූල කරන්න කියලා රජයට බල කරන එක. දැනට මේ නීතිය ක්‍රියාත්මක නොකරන්න් Etisalat සහ Dialog කියන කම්පැනි දෙක කඩා වැටේවි කියන බයට. රජය ඉන්න ඕන මිනිස්සුන්ගේ පැත්තේ මිස ආයතනවල පැත්තේ නෙමෙයි. ඒ ආයතන වල රැකියා කරන අයත් ආරකෂා කරගත යුතුයි. නමුත් පාරිභෝගික අයිතියට සෑම විට මුල් තැන ලබා දීම රජයක් සතු වගකීමක්.

2. පැට්‍රල් වලින් ඩීසල් වලින් දුවන වාහන Electic වාහන වලට මාරු වෙමු ද? අඩුම තරමේ Hybrid එකකටවත්. වාහන වල ටැක්ස් වැඩියිනම් ඒකටත් රජයට බල කරමු ටැක්ස් අඩු කරලා පරිසර හිතකාමී වාහන දිරිගන්වන්න කියලා. ඒ වගේම සූර්‍ය පැනලයක් ගෙදර හයි කරගෙන පුද්ගලික දැවිතෙල් භාවිතය ශූන්‍යය කරලා ආදර්ශමත් වන්න. අපේ රටේ මුදල් පිටට යන ප්‍රධානතම ක්‍රමය වන්නේ ඉන්දන සඳහා වැය කරන මුදල යි. අපි හැමෝම එකතු වුනොත් මේක 0 කරන්න පුළුවන්. පූර්ණ වශයෙන් අපේ රට කනිජතෙල් වලින් නිදහස් කරගන්න හිතට ගමු.

3. ETCA ගැහුවොත් ඉතින් මොන සිම් එක දාලවත් මේ ලංකා භූමියේ රැඳිලා ඉන්න එකේ තේරුමක් නෑ. අන්තිමේ දී ඉතිරිවෙලා ඉන්න සිංහළයෝ ටිකත් රට දාල යනවා. ඉතුරු වෙන්නේ මුකුත් වැඩක් පලක් කරගන්න බැරි මිනිස්සු ටිකකුයි. නොකා නොබී මැරුනත් රට දාල යන්නෑ කියලා හිතන මිනිස්සු ටිකකුයි විතරයි. අවසානයේ ඉන්දියානුවන් ගේ කොලිනයක් වෙලා නවතීවි. ඒක නිසා ETCA ගිවිසුමට විරුද්ධව පූර්ණ වශයෙන් පෙනී සිටින්න. බැරිම අවස්ථාවක් ආවොත් පාරට බැහැලා පාලකයන්ට ETCA ගහන එක අත අරින්න වෙන තැනට වැඩ සලස්වන්න හිතට ගන්න.

4. රටේ සිදුවන වන විනාශයට එකමුතුවක් නෑ. තියෙන්නේ දේශපාලනික මුහුනුවරක් ගත්ත විරෝධයක් විතරයි. සිරිපාදේ වේවා, විල්පත්තු වේවා, සිංහරාජයේ වේවා. ඒ විනාසය කරන පුද්ගලයා සිංහල වේවා මුස්ලිම් වේවා දෙමළ වේවා. හැම තැනදීම එක වගේ විරුද්ධ වන්න.
මේ හැම දෙයක්ම එද දවසක් 10000ක් වත් සෙනගන් ඔය තැන් වලට එකතු වෙලා විරෝධතාවය දැක්වූවා නම් එතනින්ම මේවා නවත්තන්න පුළුවන්. අවශ්‍යය එකමුතු කමයි. පාලකයා මහින්ද වේවා මෛත්‍රී වේවා රනිල් වේවා. කවුරුත් තේරී පත්වෙලා ඉන්නේ මහජනතාව වෙනුවෙන් සේවය කරන්නයි. ඔවුන් මහජන සේවකයන් මිස අප ඔවුන්ගේ සේවකයන් නොවන බව හිතට ගන්න. දෙකට තුනට නැවී මෝඩ හයිකාර ඇමති වරුන් ඉදිරියට ජෙබ් එකක් ඉල්ලා නොයන්න. රැකියාවක් නැතිනම් තමාට ලැබුනු බුද්ධියෙන් තමාට ලැබුන ශක්තියෙන් ව්‍යවසායකයෙක් ලෙස දියුණු වන්න.

Wednesday, December 12, 2012

බැලුම්ගල කුහක මධ්‍ය කරණය

වසරකට ආසන්න කාලයක් ලිපියක් නොලියූ මට ලිපියක් ලියන්නට ප්‍රස්තුතයක් වූයේ මේ බැලුම්ගල වැඩ සටහන යි. ආරම්භයක් ලෙස එම වැඩසටහනේ සවන්දීමට ආරධනා කරමි.



මම මේ ලිපිය ලියන්නට පටන් ගන්නේම බැලුම්ගල වැඩසටහනේ ඇති ළාබාල අතාර්කික ක්‍රමයකින් විවේචනය කරන ක්‍රමවේදය හෙළා දැකීමට බැවින්, සාධාරණ අපක්ෂපාතී, ලිවීමක් විවරණයක් මා තුළින් බලාපොරොත්තු නොවන්න. භද්‍රජී මහින්ද ජයතිලකගේ Diehard fan කෙනෙක් බැවින් තව දුරටත් එය එසේ නොවෙනු ඇත.

2002 හෝ ඊට ආසන්න කාලයක දිනක් කොළඹ මහජන පුස්තකාලය තුළ අමුතු තාලයේ පොතක් මට හමුවුනා. එහි නම "විශ්ව ශක්තිය හා චක්‍ර" හෝ එයට ආසන්න නමක් ලෙසයි මට මතක. එහි රචකයා වූයේ භද්‍රජී හින්ද ජයතිලයන්ම තමයි. ඒ වන විට ලංකාව තුළ විශ්ව ශක්තිය නමින් හෝ රේඛී නමින් හෝ කිසිවක් විද්‍යුත් මාධ්‍ය වල පල නොවුනු කාලයක්. භද්‍රජී ගැන මම ඒවන විට 70 ගීත ගායකයෙක් සහ ගීතරචකයෙක් ලෙස දැන සිටියත් ඔහු ගැන පුද්ගලිකව සෙයාබැලීමට උනන්දු වූයේ ඒ පොත කියවීමෙන් පසුවයි.

කාලයත් සමග ලංකාව තුළ විශ්ව ශක්ති හොරුන් ලෙඩ රෝග සුව කරන එලොවින් ආ ජීවිකයන් ගෙන් පිරී ගියේය. ඒ සැවොම මිනිසුන්ගෙන් ලක්ෂ ගණන් මුදල් වංචාකොට අතුරුදහන් විය. විශ්ව ශක්තිය යන්න සත්‍ය ද අසත්‍ය ද යන්න ගැන මම මේ ලිපියේ කතා කිරීමට බලාපොරොත්තු නොවේ. එසේ වුවත් යමෙක් බුදු දහම හෝ වෙනත් ආගමක් යොදාගෙන යම් කිසි වංචාකාරී ක්‍රියාවක් කර පමණින් එම ආගම අසත්‍යක් මිථ්‍යාවක් යැයි පැවසිය නොහැක. විශ්ව ශක්තිය ගැන වුවද කීමට ඇත්තේ ඒ කාරණාවයි. විශ්ව ශක්තිය යන නම භාවිතා කොට ව්‍යාපාර කරන හොරුන් තක්කඩියන් සිටිය පමණින් එම විෂය ගැන උනන්දුවක් දක්වන සියල්ලෝම වංචාකාරයන් හෝ මානසික රෝගීන් ලෙස සැලකිය නොහැකි යි.

උදාහරණයක් ලෙස බැලුම් ගල විසින් ඉතිහාසය ගැන විකල්ප මතදරන සියල්ලන් පිස්සන් සහ වෙනත් වාසි නිසා ඒ මතය පතුරන අය ලෙස පවසමින් කරන ලද ගුවන් විදුලි වැඩසටහන දැක්විය හැකියි. ඒ වැඩසටහනට අමතන ළද මා හඳුනන පුද්ගලයෙකුගේ හඬපටයෙන් ඔවුනට වාසිදායක කොටස් පමණක් දෙවන ගුවන් විදුලි වැඩසටහන තුළ ධාවනය කරමින් ඉතාමත් පහත් ලෙස මාධ්‍ය හසුරවනු අපිට දක්නට ලැබුණා. තායිලන්තය වැනි රටවල බෞද්ධයන් බුදුන් ඉපදුණේ තමන්ගේ රටේ යැයි පැවසූවට එය ගැන සටහන් කිරීම හෝ ඔවුන් උනන්දු වන්නේ නෑ.

භද්‍රජී මහින්ද ජයතිලක යනු ගායකයෙකු නොවෙයි. ඔහුගේ හැකියාවන් සමූහයක් අතරින් එක හැකියාවක් පමණයි. චිත්‍ර ඇඳීම, නවකථා, කෙටි කථා, ඉතිහාස කථා පොත්ලිවීම ආදී නොයෙක් ක්ෂේත්‍රයන් කෙරේ ඔහුගේ හැකියාවන් පෙන්වා ඇති ඉතා ශ්‍රේෂ්ඨ චරිතයකි. බැලුම්ගල කරන මාධ්‍ය පඟර නැට්ටාට ඔහුට සිංදුවක් කියාගෙන හිටියනම් හොඳයි කියලා අවවාද දෙන්න ඌ භද්‍රජී මහින්ද ජයතිලකගේ බාප්පා ද යැයි මට සිතේ. ජයතිලක මහතාගේ ජීව දත්ත සටහනක් මෙතැනින් ඔබට බලා ගැනීමට හැකි යි. http://bhadrajijayatilaka.com/bud/biography/


කෙනෙක් කරන දෙයක් විවේචනය කිරීමේ අයිතිය ඕනෑම කෙනෙකුට තිබිය යුතුයි. ඔබට ඇති තරම් ඕනෑම අයෙකු විවේචනය කරන්න. නමුත් මාධ්‍ය වේදියෙකු ලෙස ක්‍රියා කරන විට එය වැදගත් ලෙස කිරීම ඒ මාධ්‍ය වේදියාගේ පරිණතභාවය ගැන හොඳ සාධකය කි. වැඩසටහන හොඳින් සවන් දෙන්නේ නම් ඔබට ඇසෙනු ඇත අවංකව තමන් විසින් කරන ලද නිර්මාණ ආදිය ගැන කියද්දී නිවේදකයා අවඥා සහගත ලෙස එයට ප්‍රතිචාර දක්වන ආකාරය.

මීට වසර 2කට පමණ පෙර ජයතිලක මහතා සිරස රූපවාහිනියේ මුහුණට මුහුණ වැඩසටහන පෙනී සිටියා. එහිදි ඔහු සමග සංවාද කළ කිංස්ලි රත්නායක නම් නිවේදකයා හා ඉතා වැදගත් සංවාදයක් කළා. එහිදී කිංස්ලි භද්‍රජීගේ විශ්ව ශක්ති සංකල්පයට සියුම් ලෙස පහර ගැසීමට අමතක කළේ නෑ. නමුත් ඔහු මාධ්‍ය අනිසි ලෙස භාවිතා කරමින් ජයතිලක මහතාගේ පෞර්ෂ්‍යයට පහර ගසන්න ඉදිරි පත්වුණේ නෑ. ඔහුට කළ යුත්ත කියා දෙන්න හදන බාප්පා කෙනෙකු වීමට උත්සාහ කළේ නෑ. ‍

මාධ්‍ය කරුවන් මේ තත්වයට වැටෙන්නේ air time ෆිල් කිරීමට කිසිම කුණු ගොඩක් හොයාගැනීමට නොහැකි වූ විටයි. තව ඉතා වැදගත් කාරණාවක් මම මෙතනදී ඔබට නිරාවරණය කරන්නම්. මගේ මිත්‍රයෙක් සිටිනවා ඔහු බණ්ඩාර නම් කපු මහතෙකු වේ. ඔහු නෙත් FM නාලිකාවේ වසර ගණනාවක් වැඩසටහක් මෙහෙයවූ අයෙකි. ඔබ ඔහුගේ නිවසට ගියහොත් Neth FM නාලිකාව විසින් ඔහුට දෙන ලද සම්මාන බලාගැනීමට හැකිවෙනු ඇත. ඔහුත් විශ්ව ශක්තිය යොදා තමන් වෙන එන අයට සහනය ලබා දීම කරනු ලබයි. ඔබට මේ ක්‍රියාව බොරුවක් යැයි තර්ක කළ හැකියි. එසේනම් නෙත් FM එක මුලින්ම කළ යුතුව තිබුණේ තමන්ගේ මාධ්‍ය හරහා ලොවට ප්‍රසිද්ධ කරපු ඒ කපුමහතා ගැනද එවන් වැඩසටහනක් කිරීමයි. ඔවුන්ගේ මාධ්‍ය කුහකත්වය ගැන තවත් උදාහරණ කුමකට ද?

සොනාල ගුණවර්ධන සහ බුදු දහම රාජපක්ෂලාට කඩේ යැවීම.

සංවේගයෙන් ලියමි, "සොනාල ගුණවර්ධන" විසින් බුදු දහම දේශපාලනය වෙනුවෙන් වැරදි අර්ථ කථන දෙමින් භාවිතා කර ඊනියා සිංහල බෞද්ධ ඡන්ද ගැරීම...